O ukelele explicado a nenos e modernos

Ukelele, la pulga que saltaCoñeces a historia do ukelele, o instrumento cool por excelencia? A súa orixe atópase no cavaquinho, unha guitarriña pequena típica de Braga, como ben se encarga de recordarnos Victor Coyote co seu último espectáculo: ‘Ukelele, la pulga que salta’. Trátase dunha opereta folk para nenos e modernos onde atoparemos o que máis gusta aos primeiros (marionetas, lategazos, teatro de sombras) pero tamén o que máis  gusta aos segundos (música de ukelele, máscaras de ganchillo…).

‘Ukelele, la pulga que salta’ é un espectáculo de Ruido Bajito, un proxecto lateral do polifacético Victor Coyote máis achegado ás artes escénicas que á música, e onde o obxectivo é facer cousas modestas, para un público limitado, reproducindo o esquema-oxímoro de facer ruído pero baixiño, íntimo. Nesta obra cóntasenos a historia dun hit, unha historia á vez próxima e exótica, que comeza cunha guitarra pequena de Braga, continúa no barco no que viaxaba a xente orixinaria de Madeira para traballar o azucre nas plantacións hawaianas e remata co instrumento de moda do tropical verdor hawaiano. Así, a obra toma título da palabra coa que os nativos de Hawai designaron ao novo instrumento. Ukelele significa pulga saltona, e foi chamado así pola súa maneira rítmica de soar, cun timbre pequeno e agudo.

A Victor Coyote pareceulle que a historia do ukelele non era só moi interesante, senón tamén bastante descoñecida: “Atraíame esa dualidade do ukelele, coma instrumento exótico, pero tamén próximo, un instrumento de moda, pero que no sur de Galicia tamén pode ser considerado folk, un instrumento que, sendo o máis moderno, é o máis rancio, algo que poderían introducir nas súas cancións desde Luar na Lubre ata Emilio José“.

Cartel Ukelele de CoyoteAdemais precisa que un espectáculo para nenos non ten por que ser diferente a un espectáculo para adultos “Ás veces poden coincidir os gustos, a xente que non saiba a historia do ukelele está na ignorancia tanto coma un neno”. E engade: “Hai formatos que xa están ligados ao público infantil, como poden ser as marionetas, pero eu creo que a xente fai moita distinción, excepto cando algo “mola”, como pode ser a animación 3D ou o cómic transformado en novela gráfica”.

O espectáculo, híbrido,  imita a historia de mesturas do ukelele a través da confluencia de diferentes disciplinas como poden ser a ventriloquía, a música popular ou o burlesque. Visualmente é moi atractivo, o que permite que os nenos pequenos non se aburran na función, pero tamén que os maiores os copien para recibir a obra con esa mirada asombrada dos que aínda están a descubrir o mundo.

Ukelele, a pulga que salta estreouse no Matadero de Madrid hai un par de semanas e o éxito foi tal -15 días antes xa estaba todo reservado- que decidiron facer un ensaio con público o día antes. Aínda que Victor Coyote precisa “O espazo estaba limitado a 90 persoas, así que entre os pais que eu coñecía e os modernos que eu coñecía case enchían o espazo”. Para Galicia non hai datas concretas aínda, pero se todo vai ben o espectáculo estará por aquí este outono/inverno.  Nós esperaremos ansiosos.

 

Shares

    Deixa unha resposta

    O teu enderezo electrónico non se publicará Os campos obrigatorios están marcados con *