Lámparas de cartón: ecodeseño artesanal no teu salón

LAMPARAS_3076

Pensa nunha lámpara de cartón. Como é? Quizais sexa algo branda e, desde logo, non moi fiable. E si, admites que na casa tes esas lámparas de papel de IKEA e que nunca pensaras no perigo, pero de súpeto agora todo o que tes na testa ao pensar en cartón é “risco de incendio”. Borra todo o que pensaras: é moi posible que en canto vexas (e toques) en persoa algunha das lámparas creadas por Javier Fernández Calo o único que queiras sexa ter unha no teu salón. Así de especiais e seguras son.

LAMPARAS_3034Entrei na tenda pop-up que teñen estes dous meses Lámparas de Cartón no Centro Comercial A Laxe e o primeiro que quixen facer foi tocalas. Ao tacto non parecen de cartón: grazas ao verniz ecolóxico especial, as lámparas quedan duras e suaves ao tacto. Pero iso é o de menos. O mellor son os bonitos deseños e todo o que hai detrás delas.

Como se lles ocorreu? Javier é un deses moitos arquitectos aos que a crise puxo no paro. A el sempre lle gustara o cartón, e pasara a carreira facendo maquetas dos seus deseños neste material, así que cando el e máis Bárbara Alonso-Macías necesitaron lámparas para a súa casa, pensou que por que non probar. Aí empezou todo. Ante o éxito que tiveron eses prototipos entre os amigos que ían a visitalos, pensaron en facer unha pequena tirada, 30 unidades, para ver que pasaba. Con moito esforzo e maña, xa que as fixeron totalmente a man na casa, crearon esa pequena produción, puxérona á venda en Internet… e se esgotou.

Todo isto comezou en outubro de 2012 e desde entonces a vida de Javier e Bárbara cambiou por completo. Empezou a busca de financiación para un proxecto moi goloso: deseño sostible (o cartón que utilizan é de talas ecolóxicas, e algunha parte é reciclada), poñendo moito énfase no local e en conseguir produtos de calidade. “Ofrecemos un produto artesanal, orixinal e sostible”, contan, “algo distinto ás lámparas de IKEA”.

O proceso para crear cada unha destas lámparas, que teñen nomes galegos como Brétema, Bolboreta ou Vagalume, é case totalmente artesanal: Javi fai os deseños e os envía ao seu proveedor, que manda as pezas cortadas e coas ondas no seu lugar. Pero despois, todo o resto teñen que facelo eles a man con moita paciencia: cada lámpara está formada por unha serie de láminas de cartón que hai que ir pegando unha a unha, no seu lugar exacto para que as ondas formen o patrón polo que pasa a luz. Verniz e… listo! Para os máis mañosos, Lamparasdecarton ofrece tamén un kit DIY con todos os materiais necesarios (as pezas de cartón, a cola, o verniz, o portalámparas) para ser ti quen monte a lámpara.

lamparasdecarton

Bárbara e Javier facendo unha demostración co kit DIY

Canto custa todo isto? Os prezos van desde os 150 euros das lámparas máis sinxelas (o kit DIY son só 55 euros), ata máis alá dos 300. E se queres algo aínda máis especializado e personalizado, en Lámparas de cartón están abertos a suxerencias e encargos. Xa non falamos só de lámparas: se queres unha mesiña para o café, unhas cadeiras ou calquera outro tipo de mobiliario, non tes máis que pedir presuposto. De feito, entre os plans de futuro (quizais un pouco máis lonxano, agora queren “atar ben a produción” para que non haxa problemas de stock) está o de dar un paso máis e lanzarse á creación de mobles de todo tipo en cartón.

De momento están en plena andadura coma un dos proxectos seleccionados en Vía Vigo, onde están a aprender moito e moi rápido. A idea para cando saian ao mundo real é continuar creando sinerxias con outras empresas galegas e do norte de Portugal, e intentar saír fóra de Galicia e España. “Estaría moi ben que, por exemplo, unha empresa galega grande con presenza en todo o país puxese as nosas lámparas nas súas tendas”, comenta Javier.

Queres velas en directo? Podes visitar Lámparas de cartón no Centro Comercial A Laxe de Vigo durante este mes e deixar que che expliquen todo. E tamén podes mirar cara o teito a próxima vez que vaias ao Lume de Carozo, tamén en Vigo. As súas lámparas son de cartón.

Shares

Deixa unha resposta

O teu enderezo electrónico non se publicará