Nos últimos anos, varias foron as iniciativas que comezaron a recuperar a memoria das mulleres, especialmente aquela memoria vinculada a terreos nos que a súa (nosa) presenza quedara máis desdebuxada. Un deses espazos é o mundo profesional, no que a idea xeral que todos acabamos aprendendo nun momento ou noutro é que as mulleres “non estaban”.
En realidade, si o facían. Ás veces dise que as mulleres non comezaron a traballar ata o século XX, o que é – directamente – unha trapallada. Porque si, pode que as mulleres non comezaran a estudar, poñamos por caso, Medicina ata finais do século XIX, pero iso non quere dicir que non houbera outras profesións (menos glamurosas e máis ‘populares’) que non estiveran desempeñando. Entre eses traballos, estaban unhas cantas profesións do mar.
![](https://www.disquecool.com/wp-content/uploads/2019/07/Elaborando-carne-de-balea-Massó-1965-1024x634.jpg)
Elaborando carne de balea Massó 1965
A mostra O mar tamén ten mulleres, promovida polo Grupo de Acción Local do Sector Pesqueiro Ría de Vigo – A Guarda (GALP 7), reivindica ese papel das mulleres como profesionais da industria mariñeira, profesionais que son hoxe e profesionais que foron durante décadas. As mulleres traballan ou traballaron durante moitísimo tempo nas conserveiras, como redeiras, facendo descargas ou como concheiras.
![](https://www.disquecool.com/wp-content/uploads/2019/07/Traballadoras-de-Massó-na-baleeira-1960-1024x698.jpg)
Traballadoras de Massó na baleeira 1960
![](https://www.disquecool.com/wp-content/uploads/2019/07/Redeiras-reparando-aparello-na-praia-do-Señal-directamente-do-barco.-Anos-70_-1024x682.jpg)
Redeiras reparando aparello na praia do Señal directamente do barco. Anos 70
![](https://www.disquecool.com/wp-content/uploads/2019/07/Mesa-de-descunchado-do-mexillón-no-cocedeiro-de-Celso-Carballo-1974-1024x684.jpg)
Mesa de descunchado do mexillón no cocedeiro de Celso Carballo 1974
A exposición recupera fotografías de arquivos e coleccións persoais que capturan esas mulleres do mar no desempeño da súa profesión. De todas as imaxes recibidas e localizadas (unhas 150) seleccionaron 30, que son as que forman parte da instalación e as que foron incluídas nun catálogo.
As imaxes deixan claro o peso que as mulleres tiveron como profesionais na industria. Como explicaba na presentación da mostra Silvia Crespo, a patrona maior da Confraría de Pescadores Santa Tecla da Guarda, as imaxes “constitúen unha crónica da vida nas comunidades pesqueiras ao longo do século XX e axúdannos a contar a historia completa, incluíndo a de aquelas que realizaron labores non remuneradas e que compaxinaron o coidado das familias co mantemento dos aparellos de pesca ou o restrelo dos areais”.
![](https://www.disquecool.com/wp-content/uploads/2019/07/Massó-mesa-de-enlatado-contínuo-1970-1024x682.jpg)
Massó mesa de enlatado continuo 1970
![](https://www.disquecool.com/wp-content/uploads/2019/07/Redeiras-na-chabola.-Cangas-anos-60_-1024x650.jpg)
Redeiras en Cangas, anos 60
A Guarda foi a pasada fin de semana a primeira parada da mostra, que puido ser visitada entre o 11 e o 14 de xullo, pero os organizadores sinalan que é un proxecto itinerante e que chegará a outros lugares do GALP (que abrangue as rías de Vigo e de Baiona).
gpy110
mvcnv7
b2gqrj
vqeoh0
pt1rga
8me1tp
kvk787
2xe67i
v60l73
d9jovc