Xiro, os primeiros ecojeans Made in Galicia

XIRO | Disquecool

Naceron a carón do mar, en Moaña. Creceron, estudaron, incluso fixéronse rockeiros, e un día, inspirados pola forza do océano, comezaron a madurar unha idea, decidiron emprender unha “r evolution”. E así, co obxectivo de pór o seu grao de area para unha moda máis xusta, Iria García e Xulián Chapela crearon a Xiro, os primeiros vaqueiros ecolóxicos Made in Galicia.

“Xiro nace hai dous anos como unha necesidade persoal. Xa había tempo que buscabamos unha forma consciente de consumir comida, produtos de hixiene, limpeza… e observamos que na roupa había moi pouca oferta”. Así, da propia necesidade, da impotencia de non poder vestir doutro xeito pola falta de opcións, esta marca galega foi pouco a pouco agromando, sen presa pero sen pausa, e para comezar esta revolución decantouse polos vaqueiros, unha prenda básica, versátil e resistente.

A sensibilización sobre a industria da moda e a necesidade de cambiala foi desde un principio un dos eixes de Xiro. “Vivimos nunha sociedade na que o consumo pasou a converterse nunha forma de vida que xera pobreza extrema en moitos lugares do mundo e acaba cos recursos naturais. É obvio que ninguén quere un mundo así, pero moitas veces nos vemos somerxidos nese sistema de consumo extremo e de ritmos de vida tan rápidos que non nos deixan tempo para pensar. Ao escoller opcións máis respectuosas coas persoas, animais, natureza…estamos fomentando un sistema máis xusto”.

A Costa Atlántica é a súa fonte de inspiración, e a súa forza e bravura unha motivación para loitar, aínda a contracorrente. Neste camiño a marca galega aposta polo uso de tecidos ecolóxicos certificados por GOTS, unha norma que garante que tanto os cultivos das fibras como todo o proceso de fabricación dos tecidos están libres de pesticidas e químicos tóxicos, que habitualmente se empregan na industria téxtil convencional, provocando a contaminación da terra e da auga, afectando á biodiversidade e causando enfermidades. Para a confección comprometéronse desde o primeiro momento con fabricar en Galicia, polo que os pantalóns fanse dentro da rede de talleres de Latitude, que aposta por unha relocalización sostible da industria téxtil galega.

XIRO ECOJEANS | Disquecool

Os primeiros jeans ecolóxicos galegos son de corte slim fit e acabado raw, o que resulta máis sostible, xa que non foi tratado despois de ser confeccionado. Segundo explican Iria e Xulián, isto produce que o seu aspecto inicial sexa un pouco ríxido ou que o tecido non sexa tan uniforme. Eles propoñen dúas formas de coidado e lavado: unha convencional de lavado a baixa temperatura, e outra de non-lavado ou lavado aos 6 meses. Esta última opción, da que se está a falar moito ultimamente no mundo do denim, está detallada paso a paso na súa web e ten moito que ver co aspecto do pantalón e a comodidade.

Esa preocupación pola sostibilidade tamén se nota no packaging. Para os envíos postais utilizan caixas de cartón e bioplástico de pataca, e para as feiras bolsiñas feitas con redes de pesca. Todo está tan pensado que a etiqueta colgante do pantalón pode sementarse e converterse nunha planta.

Para Xiro é moi importante visibilizar está revolución que está no ADN da marca. Por iso tamén é responsable das Upcycling Sessions, que puxeron en marcha coa marca de Vigo Le Chanelas para crear unha minicolección de camisetas concienciadoras, aproveitando restos de tecidos, materiais en desuso e redes de pesca. Para o futuro, Xiro proponse introducir novidades DIY (Do It Yourself), traballar máis a sensibilización, seguir posicionando e dando a coñecer a marca e introducir novos modelos e cores de ecojeans, así como novas prendas.

O importante é ir pouco a pouco, e pensar que as accións, por pequenas que sexan, contribúen ao cambio. “Non se trata de comezar a cambiar todo 100% , xa que isto pode resultar frustrante e facer que remates por abandonar  ao paso de unha semana, senón de ir integrando na nosa vida hábitos positivos (sexan de consumo ou non) que contribúan a acadar un mundo mellor, a pesar do utópico que poda sonar isto… E sobre todo non pensar aquelo de total ninguén o fai porque cada persoa e cada acción, por pequena que sexa, suma e vai cambiando o rumbo a pesar das dificultades”.

Fotos | XIRO

Shares

1 comentario

Deixa unha resposta

O teu enderezo electrónico non se publicará Os campos obrigatorios están marcados con *