Posiblemente cando alguén che fala de escribir un diario, pensas inmediatamente en preadolescentes con diarios con candadiños (que seguro que os seus pais son capaces de abrir cunha pinza do cabelo – o que seguramente os faga sentir como axentes especiais dalgún serie da televisión – para espiar os seus secretos) ou en mulleres de vidas aburridas do pasado moi pasado que agora son publicados en complexas edicións anotadas (por que as notas a pé de páxina son agora notas ao final do capítulo ou no final do libro?). Pero o certo é que un diario é algo máis que todo iso. Pode ser a chave para a túa creatividade. Iso é o que recomenda, entre outras cousas, Austin Kleon no seu provocador libro (é ou non é atrevido o seu título?), Steal Like an Artist: 10 Things Nobody Told Me About the Creative Life
Kleon recomenda manter un caderno de bitácora, que se cadra é un termo máis axeitado. Non se trata de escribades sobre o mal que vos levades cos vosos pais, o moito que vos mola X (que por suposto non vos fai caso, que para iso é unha historia amorosa de diario!) ou as vosas derivas narcisistas. Non. “Tal como precisas unha gráfica para os eventos futuros (outra recomendación), necesitas unha para os pasados”, apunta. Non tes que facer dramáticas reflexións, senón escribir en que estás traballando, a onde fuches comer ou a peli que viches no cine, indica, porque todos eses pequenos detalles servirán para que no futuro podas recordar os grandes e funcionarán como unha sorte de madalena de Proust que acelerará o teu cerebro (e a túa creatividade).
Pero por suposto levar un diario non é máis que unha mínima parte das recomendacións que fai Austin Kleon en Steal like an artist para como conseguir ser creativo (e non morrer de desesperación no intento). A primeira é, como indica o título, a de esquecer que temos que atopar grandes ideas e moitas cousas novas porque os artistas non inventan nada… en realidade rouban. Todo está inventado. Os artistas, as persoas creativas, asegura, van collendo de aquí e de alí e o resultado final é esa cousa marabillosa que son as obras. E como hai que ir roubando alí a acolá, o mellor é ter sempre enriba algo que nos permita anotar. Un pequeno caderno servirá.
Ese é o primeiro paso para ser un escritor, un deseñador, un artista. Un dos segundos é o de mentir ata que chegue o momento. O importante é a pose!!! Non es nin un escritor, nin un deseñador, nin un artista… pero non importa. Tes que dar a impresión de que xa o es. E a conversión nun deles chegará ao final. Finxe ser ata que o sexas.
Outros consellos para conseguir ser creativo son o de separar o mundo dixital do analóxico e non esquecer nunca a ese último (Kleon ten no seu estudio dúas zonas separadas: a do ordenador e o techie e a do papel e os bolis), deixar a casa (porque nada nos fai espertar máis que andar en contacto cos outros) ou non deixar o traballo (porque se non tes con que mercar para comer, malamente poderás ser creativo).
Foto Magic Madzik
