Se algunha vez tiven algunha ilusión de facer carreira no mundo da cociña profesional, de sentarme nunha cadeira no medio da cociña e mandar tipo Alberto Chicote ou o cociñeiro malvado de ‘Ratatouille‘ xa podo ir esquecendo calquera brote de entusiasmo. Non nacín para ser xefa de cociña e seino moi ben porque onte puiden selo durante 30 minutos de estrés.
Preguntarédesvos porque me metín en semellante historia: todo foi unha obrigación de xornalista decidida a cubrir ao 100% unha feira. Dende o xoves e ata o sábado, Madrid acolle o Zinc Shower, unha feira sobre as industrias innovadoras e creativas que quere facer moito ruído e converterse nunha cita estatal para o sector. Nós estamos acreditados (se o tema vos interesa, podedes seguilo tamén no noso medio irmán Zmart.co) e o programa é moi completo e longo, cheo de ponencias con nomes prometedores como o que me levou a un camión. Como se pode fusionar a cociña coa innovación en equipo? A resposta estaba dentro!
Ao xornalista que cubre feiras ás veces danlle unha sorpresa. Vai a encontros de nomes emocionantes e atopa auténticos tormentos, ponencias que poden matar a quen a escoita con pouco esforzo. E outras veces, pola contra, atopa algo sumamente divertido ou fascinante cando non daba un can pola charla á que decidiu ir. A innovación en equipo na cociña prometía, pero acabou sendo unha das experiencias máis divertidas da cobertura do Zinc Shower.
Todo comezou ás portas dun camión, onde tivemos que agardar baixo o sol de mediodía (o dos días de chuvia récord non afecta, a pesar dun inverno bastante malo, a Madrid) a que se enchesen as prazas precisas para comezar. Nun evento no que xa vin algún motín por non conseguir entrar nalgunha charla, a cociña innovadora non conseguía encher o que precisaba para funcionar. Cando por fin estivemos os necesarios, pasamos ao camión. Unha pequena charla introdutoria, un xogo para crear equipos e un reparto de gorros de cociñeiro (como che tocase o vermello como a min acababas de xefe de cociña) e xa estaba o xogo creado. Porque este evento concreto non vai de palabras, vai de acción.
O hotel escola El Rondón, en Ávila, acaba de abrir un camión escola, que lles permite desprazarse alá onde son necesarios. Só hai que contratalos. Dentro do camión de 50 metros cadrados (o clásico tráiler) non só se esconde un aula senón que tamén existe unha cociña industrial, plenamente equipada. É como a dun hotel ou un restaurante, pero en miniatura. Teñen a zona de auga para facer o baño María, as pranchas e os fogóns industriais ou as incluso en miniatura enormes cámaras frigoríficas. A intención de El Rondón é que o camión lles permita chegar a calquera lugar: polo de agora os seus clientes son sobre todo de Ávila, pero co camión poden chegar a calquera lugar. E ademais as empresas reducen o custe de mover aos seus empregados ata o hotel e os problemas de horarios que poden implicar unha actividade como esta. Eles dan clase para profesionais da hostalería, para particulares que queren aprender algún elemento concreto de cociña e para empresas que queren facer actividades de equipo. Como me dicía unha das responsables despois da proba, o paintball estivo de moda. Estivo. Agora chegan novas cousas e para facer equipo xa non hai que matar ao xefe de departamento a golpes de pintura.
Nesta práctica, o importante é traballar en equipo, ser capaz de tomar decisións rápidas e ser creativo, ademais de ser capaz de pedir axuda á xefa de cociña real cando é preciso. O tempo pasa moi rápido e cando te das conta xa todo o mundo está acabando a presentación dos seus pratos mentres ti aínda estás imaxinando como funciona a Thermomix. Estás suorosa, colorada e tes o gorro de cociñeira pegado á cabeza. E hai restos da comida un pouco por todas partes. O incrible é que é realmente divertido. Cando rematas, dáste conta de que esa media hora de traballo foi realmente unha diversión. Como contaba unha das responsables, todo o mundo sae contento deste tipo de prácticas de team building e realmente ninguén se mostra remiso a participar (que llo digan aos que queren facer tirolina e cousas así para facer equipo no traballo…)
