Hoxe imos falar da empresa que está detrás da Comic Sans e de Clipo, dous dos grandes inventos da Humanidade completamente incomprendidos. Hoxe imos falar de Microsoft, os que posiblemente son o cerebro do sistema operativo do ordenador no que estás lendo isto (se es de Mac pedimos desculpas e se estás no móbil dámoslle o pésame a Microsoft), os que están detrás do pantallazo azul que fai que a miña relación con Portátil (antes o meu mellor amigo) sexa agora tirante e os que tiveron como xefe durante tanto tempo a Steve Ballmer. Este Steve Ballmer.
E eu, como a Clipo, téñolle certo cariño*. Pero sei que son única.
Pode que se non es un interesado nas novas tecnoloxías, Steve Ballmer che soe a chinés. Pode que a mesma – e outrora todopoderosa – Microsoft che importe pouco. Pero se estás lendo Disquecool pode que sexas un hipster. Pode que o sexas no fondo do teu corazón e aínda non o saibas. Pode que te identifiques con este home do que che vou a falar. Porque onte Microsoft anunciou a nova identidade do seu xefe. E é un hipster. De verdade. Hai varias cousas que o indican.
Para empezar a súa foto de presentación corporativa. Este é Satya Nadella.
Esta foto xa fixo que algúns gurús das novas tecnoloxías de Estados Unidos, como Kara Swisher (non tedes que coñecela, só fiaros de min e saber que é unha mega gurú) xa falaron en Twitter do seu look hipster. E CNET, unha das Biblias techie de internet, xa comezou a titular por ‘CEO hipster’.
Pero é realmente o novo conselleiro delegado de Microsoft un hipster?
1. Leva gafas de pasta. E si, vale, todo o mundo llas roubou xa aos hipster. Pero aínda son un indicativo de que pode que esteas ente un hipster.
2. Leva esa sudadera. Só mirádeo.
3. Traballa en Seattle. Si, a capital dos modernos Seattle. E non, Microsoft non está en Silicon Valley. Está nun edificio (moderno) a 21 quilómetros de Seattle. Eestá en boa forma, así que seguramente coma cousas moi saudables que se venden en restaurantes moi orgánicos dunha cidade chea de cousas para modernos.
4. O seu deporte favorito é o cricket. Vale que é indio e que en India é un deporte bastante popular (moi popular realmente) pero para os demais non deixa ser algo super pouco mainstream.
5. E o seu outro hobby é a poesía. “É como o código. Intentas facer algo que poda describirse en moitas, moitas oracións e páxinas de prosa, pero que podes converter nun par de liñas de poesía e aínda mantés a esencia”, son as súas reflexións sobre poesía e tecnoloxía. “O mellor código é poesía”.
6. Gústanlle os libros e non exactamente ‘O código Da Vinci’. Na súa morta conta en Twitter (non actualiza dende 2010, pero xa ten máis de 24.000 followers) recomenda un libro non dos máis populares.
All About H. Hatterr… quite a read!
— Satya Nadella (@satyanadella) April 6, 2009
E na súa carta aos empregados de Microsoft di: “merco máis libros dos que podo rematar” (por iso, Satyan, xa te queremos). E usa unha cita de Oscar Wilde.
7. Fai cursos online. E de verdade non hai nada máis moderneo que Coursera. Temos a esperanza de que Satyan Nadella estea apuntado neste curso.
*Ballmer despediuse hai uns meses cunha canción de Dirty Dancing. Penso que deberiades sabelo.
