Os álbums de fotos agochan interesantes segredos. Seguro que algunha vez remexiches no faiado e atopaches, medio esquecidas dentro dunha caixa cuberta de po, as fotos de xuventude de túa nai, e seguramente quedaches abraiado/a co que nelas descubriches: facetas descoñecidas, poses dignas de foto de perfil de Facebook, e looks sorprendentes que desexarías ter no teu armario. Porque as modas sempre volven, e porque segundo reza o blog My Mom Style Icon, o estilo das nosas nais naceu antes ca nós.
A neoiorquina Piper Weiss defínese como unha persoa obsesionada cos gatos, Alan Alda, os homes que se parecen a Zach Braff, e este vídeo de Elvis. É ademais editora de Shine, o sitio web para mulleres de Yahoo.com, e tamén ela un día atopou un vello álbum de fotos da súa nai esquecido nun armario. Eran imaxes de mediados dos 60, nos que a súa proxenitora, Marilyn, percorría Europa coa actitude de liberdade que caracterizou a esa xeración. Tanto lle gustaron que decidiu publicalas nun blog, e invitou aos seus amigos a que lle fixeran chegar fotos das súas nais. Así nacía My Mom, The Style Icon, que pronto adquiriu unha gran popularidade na re
de, con centos de instantáneas chegadas de todo o mundo.
O blog recolle unha interesante colección de fotografías de nais (e tamén avoas), con impresionantes looks e estilos detrás dos cales sempre reside unha historia. Nais aínda adolescentes ou na súa vintena, posando enriba dunha moto ou sobre o capó dun coche, viaxando, en bañador, en estampas campestres e actitudes hippies, sentadas no sofá de casa, e tocando en bandas de Rock and Roll. Tamén historias sorprendentes, como unha nai de Amsterdam que pertencía a un grupo activista clandestino que loitaba pola igualdade de xénero, ou unha avoa que pilotaba avións.
O éxito deste blog levou a Piper Weiss a lanzar un libro no que recolle as mellores fotos e historias, para poder gozar da elegancia e estilo das nais tamén sobre o papel. O proxecto complétase co blog Don’t f*** with dad, bastante menos exitoso e traballado (a última actualización é de agosto do ano pasado), que recolle instantáneas de pais con poses fachendosas.
Se aínda non o fixeches, rebusca entre as fotos da túa nai, de seguro atoparás máis dunha xoia, e acabarás maldicindo o momento no que decidiu tirar con ese abrigo, ese vestido ou esa minisaia que herdarías con sumo gusto.
* Podes consultar as fotografías e as súas historias no blog My Mom, The Style Icon. O libro está dispoñible en Amazon.
Fotos | My Mom, The Style Icon
