Disquecool invita: Voces Femeninas 2014 en Vigo e Ourense

vf2014

Que rápido pasa o tempo, non? Parece que Disquecool empezou hai nada e que foi onte cando argallamos cos rapaces de Coconut Producciones o primeiro sorteo para un Festival Voces Femeninas… pero xa o facemos por cuarta vez! Como quen volve polo Nadal, a finais de ano volven sempre a nós (ou volvemos nós a eles) o Culturgal e Voces Femeninas. Dúas das nosas tradicións preferidas! Pero deixémonos de sentimentalismos, imos ao que vos interesa. Xa lestes o titular e xa sabedes de que vai isto. Hai un sorteo, si, pero falemos un pouco de música antes. Quen vai este ano ao Voces Femeninas?

Temos por unha banda a tUnE-yArDs, o proxecto da americana Merrill Garbus, que fai unha música tan difícil de explicar que o mellor e aforrar as palabras. Porque seguro, seguro, seguro que nos quedaríamos curtos. Orixinal ata dicir basta, gaña varios enteiros, din todos, cando se sube a un escenario. Tocou hai nada no programa Later with Jools Holland e deixou impresionado ao mesmísimo Robert Plant (si, si, o de Led Zeppelin), que era tamén invitado no programa. Isto hai que velo, non?

A outra protagonista da noite será Ólöf Arnalds, unha desas artistas de voz perfecta e distinta, de melodías cheas de beleza, de secuencias que nos trasladan á súa Islandia natal. Foi membro en directo de múm durante cinco anos, colaborou con Björk e, o mellor, leva xa catro álbums en solitario nos que desfrutar de todo isto. O último, ‘Palme’, acaba de saír á luz en dúas versións: unha en inglés e outra en islandés. Así hai para todos os gustos (ou para saciar sedes de coleccionismo).

Queres ir, non? O Festival Voces Femeninas 2014 terá lugar os vindeiros 26 de novembro en Madrid, 27 en Ourense e 29 en Vigo. Para estes dous últimos concertos, o de Ourense e o de Vigo, sorteamos dúas entradas dobres. Que tedes que facer? O que vos pedimos sempre: deixar un comentario nesta entrada contándonos quen tocaría no voso Festival Voces Femeninas ideal, indicando tamén se queredes entrada para Vigo ou Ourense. Ideal significa que aceptamos tamén a artistas que xa non vivan, porque soñar non ten límites, xa sabedes. Deixade o comentario antes do día 9 de novembro ás 23:59. Faremos o sorteo o día 10 e enviaremos un mail aos gañadores, que deben contestar antes do día 14 ás 23:59. Se non temos resposta, repetiremos o sorteo.

Sorte!

Shares

81 comentarios

Deixa unha resposta

O teu enderezo electrónico non se publicará