Silk, avogados estresados en Londres

O mundo das leis anglosaxonas é incriblemente pantanoso. Para empezar, os avogados son de dúas clases en Inglaterra. Están os solicitor, que son os que traballan directamente cos clientes, e os barrister, que son os que realmente fan o traballo ante o tribunal (máis na Wikipedia; segundo a versión en inglés, a diferencia entre uns e outros podería ser similar á que separa procuradores e avogados en España). Para rematar, o que todo avogado quere ser é un conselleiro da raíña, unha categoría máis elevada dentro da avogacía e que lles permite, e esta é a parte máis visual do asunto, vestir unha toga de cores, levar seda.

Conseguir a seda é, por tanto, a carreira á que lanzan os avogados ambiciosos, como Martha Costello e Clive Reader, que traballan xustos no bufete de Shoe Lane Chambers. Os dous avogados están baixo o control de Billy Lamb, o senior clerk que reina sobre o bufete no que se centra ‘Silk’, unha das series da última tempada na BBC que agora chega a España vía Filmin. Lamb tenta alentar a ambición tanto de Costello como de Reader para que consigan seda, mentres as augas do bufete que debería dirixir non baixan de todo tranquilas.

A eles súmanse os seus pasantes, os dous mozos que empezan tutorizados por Costello e Reader. Nick Slade, o discípulo de Martha, que “non naceu cunha culler de prata na boca” (como lle di nunha ocasión Billy Lamb) e Niamh Cranitch, a de Reader (un donxoán de medio pelo que a escolleu por razóns bastante ilexítimas), que é a filla dun coñecido xuíz.

A vida dos seus personaxes é terrible. Son todos uns workaholics de libro, absorbidos por un traballo que non lles da cancha para facer pouco máis que traballar, estando baixo unha terrible presión e movéndose nun mundo de intrigas e miserias. Porque o mellor desta serie, o que a fai diferente a outras series de profesionais, é que os seus protagonistas son xente que vive con todas as súas miserias e todas as súas debilidades. Non estamos ante unha serie máis de avogados na que teñen tempo para beber champagne e levar stilettos mentres destrozan a xente malvada en casos impresionantes. Aquí todo vai moi rápido, os casos son do máis normais e a protagonista leva uns zapatos aburridos dignos de calquera azafata de voo que sabe que vai estar moitas horas en pé. Detrás de ‘Silk’ está un antigo avogado londiniense, que quixo reproducir con realismo como funciona o distrito xudicial de Londres.

O único que se cadra a serie non explota o suficiente é a parte emocional. Como era de esperar, Clive Reader acaba tendo un affaire coa súa pasante, unha historia chea de partes escuras por ambos lados. O que era menos de agardar é que a protagonista descubra no primeiro capítulo que está embarazada (e non, non vos imos dicir quen é o pai da criatura), algo que lle crea grandes dúbidas. As relacións amorosas ou a ausencia de relacións amorosas son asuntos que fan pivotar a trama e as decisións dos personaxes, aínda que estean tratadas dunha forma máis superficial.

Seis capítulos co selo de garantía da BBC (God save the BBC!): unha estupenda opción para engancharse nunha fin de semana e que pronto terá segunda parte.

Fotos | BBC 

Shares

Deixa unha resposta

O teu enderezo electrónico non se publicará