Non tes que recoñecelo publicamente, tan só agora para ti, agora que ninguén mira, asentindo diante da pantalla do ordenador. Nesas fotiños que sacas co móbil e ás que engades un bonito filtro vintage antes de colgalas en Instagram e no resto das redes sociais nas que estás, nesas pequenas imaxes con aire nostálxico e retro, tes posta algunha aspiración artística secreta. E, para que negalo, cres que algunha delas é ata digna de museo.
Non sigas pensando. Os teus máis escuros desexos están a piques de verse cumpridos: imaxina que as túas fotos non só son exhibidas nunha exposición, senón que ademais se trata dunha expo simultánea en máis de 30 lugares. Oh, si. É posible. Estamos a falar de Ubiquography.
Que é Ubiquography? A resposta lóxica ás novas formas de interacción cos nosos teléfonos e coa arte. Una exposición colectiva que, segundo contan na súa web, pretende facer unha reflexión sobre os trazos que definen a iPhoneografía (si, liches ben, a fotografía co iPhone é xa un xénero): ubicuidade e inmediatez.
Como funciona? E, o que seguro que estás desexando saber, como facer que a túa foto sexa exposta? Moi sinxelo: tan só tes que rexistrarte na web e, se a túa solicitude é aceptada, publicar as imaxes de Instagram que queiras que formen parte da exposición co hashtag #ubiquography.
E entón chega a maxia: entre hoxe e o vindeiro 8 de xuño, todas as fotos publicadas co hashtag irán sendo proxectadas na expo, de forma simultánea en distintos lugares e no mesmo instante no que o autor publique a imaxe. O teu público estará repartido polos máis de 30 centros expositores que xa se teñen ido apuntando en todo o mundo.
O momento de fama de cada foto pode durar varios minutos ou apenas uns segundos: dependerá de dos fados do destino, xa que cada foto estará exposta ata que alguén suba outra en calquera parte do mundo. Algunha vez quedaches un bo rato mirando o salvapantallas do ordenador porque tes escollida a opción de ir amosando fotografías aleatorias do teu disco duro? Prevemos sensacións similares con Ubiquography.
Poderemos comprobalo en persoa? Si! De momento hai dous lugares en Galicia que acollerán a máxica exposición: Espacio Nido en Vigo e The Room en A Coruña. A inauguración é hoxe: a partir das 19 horas en Espacio Nido e ás 20:30 en THE ROOM. Xa sabes, a ubiquografar!
* A expo estará no Espacio Nido (Manuel Núñez 35, Vigo) hoxe e mañá entre as 19 e as 21 horas. En THE ROOM (Santiago 7, A Coruña) terán a expo a todas horas: cando estean abertos, será dentro, cando non, proxectarán as imaxes cara unha ventá cunha tea translúcida de forma que se poidan ver desde a rúa.
