Xogo de beber para a túa festa de Eurovisión 2015

Conchita

Un ano máis chega o noso sábado preferido do ano: o do Festival de Eurovisión! En Disquecool somos eurofans orgullosos, como ben sabedes (e como sodes tamén moitos de vós, para a nosa alegría), e cada ano desde hai xa dez xuntámonos para ver o festival dos festivais, ese ao que soñamos ir desde hai moito tempo. A festa da democracia europea! O momento no que, en palabras do noso amado John Oliver, Europa sublima todos eses anos de guerras, veciñanzas tortuosas e relacións de amor-odio.

O ideal, claro, sería ver o festival totalmente sobrio, que isto é algo serio, pero somos xente débil. Xuntanza entre amigos, música de discoteca, baladas intensas, frikadas absurdas… cando os gintonics empezan a fluír, xa non hai quen os pare. Pero e se tivesemos unha escusa para o alcoholismo eurovisivo? Algo tipo un xogo de beber. Xa sabedes, eses xogos nos que todo o mundo quere perder porque todo o mundo quere emborracharse. Estades de sorte! No noso xogo cremos que será bastante doado acabar a noite… en fin, depende da bebida que escollas. Estas son as normas!

  1. Bebe un grolo cada vez que:
    1. Haxa un cambio de vestiario.
    2. Íñigo diga algunha burrada.
    3. Penses que o concursante vén doutra década. Dous grolos se son os 90.
    4. Dubides da pertenza a Europa dun dos participantes. Acaba o vaso se xurarías que son de Oceanía.
    5. Durante as votacións, acertes os puntos que un país lle dá a Edurne.
    6. Un dos músicos ou bailaríns mire a cámara e intente parecer sexy/simpático/terrorífico
    7. Apareza un violín
    8. Un país balcánico vote a un país balcánico
  2. Érguete e bebe dous grolos cada vez que:
    1. Apareza o teu elemento (escolle un: fogo/auga/aire/terra)
    2. Alguén cante nunha lingua que non sexa o inglés
    3. O participante toque algún instrumento
    4. Vexas un destes elementos (escolle un): capa/plumas/tirantes
    5. Á hora das votacións, algún dos presentadores dos distintos países vaia vestido moi raro
    6. Algún dos teus amigos intente falar do 24-M
  3. Brinda coa persoa que teñas ao lado (podes beber ou non despois, é cousa túa) cada vez que:
    1. Apareza un traxe rexional.
    2. Un participante diga: “thank you, Austria/Vienna!”
    3. Íñigo se refira á beleza dalgunha das participantes.
    4. Nunha canción escoites as palabras: peace/love/together/forever
    5. Escoites un cambio de clave nunha canción.
    6. Alguén fale do ano do Chiki Chiki e de como as cousas xa non son o que eran.
  4. Érguete e baila cada vez que:
    1. Haxa unha coreografía grupal (imítaa).
    2. Alguén baile algo que podería ser calificado de “rexional”.
  5. Bebe todo o vaso cada vez que:
    1. Apareza un espontáneo.
    2. Íñigo faga un comentario sexista.
    3. Apareza un tigre no escenario (temos grandes esperanzas coa actuación de Edurne, si).
    4. Unha canción conte cos 4 elementos da canción eurovisiva perfecta, segundo Neil Hannon: bo ritmo, letras sen sentido (lalala, ououou), cambio de chave e toques irlandeses.

  6. Érguete e aplaude cada vez que apareza Conchita. E bebe tamén, porque por que non.
Shares

Deixa unha resposta

O teu enderezo electrónico non se publicará Os campos obrigatorios están marcados con *