Disquecool invita: Neil Halstead, La Familia del Árbol e Matthew P en Vigo

Como ides de concertos no que vai de ano? Hai un que de seguro non vos queredes perder: o de Neil Halstead, La Familia del Árbol e Matthew P, que estarán a principios de febreiro en Galicia. Primeiro en Ourense, o día 1 de febreiro, concerto para o que xa non quedan entradas. Despois irá a Vigo, o día 2. E para ese concerto temos dúas entradas individuais que queremos sortear. Que tedes que facer?

En primeiro lugar, tedes que coñecer a Neil Halstead. Non é que sexa imprescindible para participar, pero si para que se non sabedes quen é, descubrades a un dos vosos novos artistas favoritos. E tedes moito onde indagar! Non só busquedes o seu nome en Spotify, buscade Slowdive, buscade Mojave 3. Hai para todos os gustos. Por exemplo, houbo un tempo hai xa bastantes anos no que unha das nosas disquerredactoras non podía parar de escoitar isto:

Sodes xa fans? Perfecto. Agora que estamos todos no mesmo estado anímico que provoca escoitar a este home (suspiros, algunha bágoa, pensamentos existenciais), queremos sacarvos del e facervos unha pregunta superficial. A fin de contas, este é un medio de tendencias. Profundidades a nós! A pregunta que queremos que contestedes nos comentarios para participar no sorteo ten que ver coa imaxe de Neil Halstead. Mírao ben.

Neil Halstead

A barba, como ben sabedes xa algúns, é o novo bigote. Pero as barbas levan presentes no mundo da música moitos anos, van e veñen nalgúns casos, son constantes nalgúns estilos, son máis ou menos frondosas… A PREGUNTA: Cal é o voso músico barbudo preferido -xa sexa pola barba ou pola música? (Neil Halstead non vale, que nin sequera leva sempre barba) Tedes ata o domingo 20 ás 23:59 para contestar, o día 21 escribiremos un mail aos gañadores. Se non contestan antes do venres 25 ás 23:59, sortearemos de novo.

Sorte!

*As entradas son cortesía de Coconut Producciones. Grazas!

Shares

35 comentarios

Deixa unha resposta

O teu enderezo electrónico non se publicará