No mundo da cosmética todos os produtos parecen superglamourosos. Nas páxinas das revistas de beleza recomendan sempre bases de maquillaxe, estupendos eyeliners ou, cando chega o momento, cremas anticelulíticas. Pero… que pasa cos pés? Que pasa cos produtos feos e un pouco humillantes para pés? A review cosmética de hoxe é a dunha mascarilla de aspecto pouco estiloso e nome que bota para atrás e destinada unicamente aos pés. Chámase Volcano e é de Lush (esa marca que tanto nos gusta polo arrecendo das súas tendas – aproveitade calquera viaxe polo mundo para cheirar unha delas – e os seus produtos feitos de xeito artesanal que che fan sentir que nada malo lle poderá pasar á túa pel por empregalos).
Volcano é a clase de produto que mellor ninguén che vexa utilizar (se o decides logo contar nun medio de referencia como é este… alá o teu problema! O dano que lle farás á túa imaxe chic xa non terá solución) porque, por moito que te esforces, non conseguirás facelo dun xeito que non sexa penoso. O aspecto da mascarilla, que vén nun tarro negro deses típicos de Lush (o meu feito por un tal Farad non hai moito), é bastante desalentador. Atoparás unha pasta gris, de cor espazo-post-industrial-apocalíptico, que non cheira nada ben. Nada ben en absoluto.
Tras pasar o primeiro trauma de apertura do bote, hai que botalo nos pés. Unta ben o primeiro e… empaquetao en film transparente!! Lembras esas mulleres e eses homes sempre ridiculizados nas películas por empaquetarse en film dos sándwichs para perder peso e quedar tipo top model? Pois iso é o que terás que facer con cada un dos teus pés. Se non tes film non desesperes: podes facer o mesmo cunha bolsa. A proba do laboratorio cosmético de Disquecool empregou bolsas de conxelación, o que lle deu un toque aínda máis ridículo e humillante cal castigo dos deuses do Olimpo ao proceso. Unha vez que teñas os pés empaquetados (e unha vez asegurada a non existencia de ningún ser humano que poida ver o teu ridículo aspecto), podes facer o que máis che apeteza. Ler, pensar como empezar unha crónica cosmética en Disquecool, cuestionarte se todo isto pagará a pena ou será unha parvada digna de que a túa nai che retire o saúdo… Terás un tempo para meditar, porque a máscara ten que estar dez minutos en barbeito para facer efecto.
Pasados os dez minutos, terás que retirar a mascarilla con movementos circulares. Semellará que non pasa nada (eu sempre agardo por algún efecto brutal tipo anuncio da tele tipo antes e despois). Aclara con auga ao final para eliminar calquera resto. Bota a túa crema de sempre para pés (ou algo hidratante para darlle o toque final).
Pagou a pena semellante esforzo, semellante humillación plasticosa? Paga. Os pés quedan sorprendentemente suaves, incluso nas tradicionais partes máis chungas, e sentirás que acabas de facer algo estupendo pola túa saúde (os pés chungos non poden ser cousa boa!) O proceso é un pouco extremo, pero non moi complicado, así que calquera se pode lanzar ao encanto de Volcano.
Volcano está feita de arxila, aceite de limón, papaia, canela e tomates. O bote de 125 gramos sae a 9,25 euros.
Podes ler máis reviews de cosmética no noso ‘probamos’
“Mascarilla?” e por que non “mascarita”? Ou mellor ainda, deixémolo en MÁSCARA que é o correcto.