12
Abr
2012

Chapas con tapas de botellas

Pois ben, hoxe imos de volta coa reciclaxe!! E desta vez con algo ben sinxelo, coma facer unhas bonitas chapas coas tapas metálicas dunhas botellas e algo de pintura!!

Como acabamos de dicir, os materiais que precisamos son moi sinxelos: tapas de botellas, pinturas acrílicas, uns imperdibles, verniz brillante e unha pistoliña de cola.

O primeiro é pensar o que queremos debuxar nas tapas. É importante elixir debuxos sinxelos, xa que o espazo é ben limitado. Eu déixovos uns exemplos dunha froita, un animal e unha flor.

Unha vez que xa temos as tapas pintadas darémoslles unha capa de verniz brillante para protexer o debuxo e que queden máis bonitiñas!!

E por último coa axuda dunha pistoliña de cola fixaremos os imperdibles ás tapas pola parte posterior das mesmas.

E voilá!! Listas para lucir!!

06
Abr
2012

Carteira de cómic

Boas de novo. O que imos facer hoxe é unha carteiriña de cómic, cos seus apartados para moedas, billetes e ata tarxetas!!

Os materiais que precisaremos serán un cómic (para non desfacervos dun ao que lle teñades certo “cariño” sempre podedes adquirilo a bo prezo nunha tenda de segunda man); forro autoadhesivo para cubrilas follas do cómic que usemos; fío algo grosiño; unha agulla, tamén algo grosa para poder coser ben co fío elixido, e un pouco de velcro.

O primeiro será cortar a parte principal da carteira que cubrirá ao resto e vai ser a máis grande. Será un rectángulo de aproximadamente 16 centímetros de longo por 11 de ancho. Tamén cortaremos unha especie de trapecio alongado (como se pode ver na foto) para facer o peche da carteira.

Agora cortaremos unha peza igual de longa que a anterior pero un pouquiño máis estreita (un ou dous centímetros), que será o separador da zona de billetes.

Tamén cortaremos catro rectángulos de cinco centímetros de longo. De ancho, o maior destes rectángulos será igual que o separador de billetes. Outro destes rectángulos será de ancho un centímetro menos que o anterior, e así igual cos seguintes, sempre un centímetro menos que o anterior. Con estes rectángulos faremos os separadores para as tarxetas.

As últimas pezas que teremos que cortar son as do apartado das moedas, que serán un rectángulo do mesmo ancho que o separador de billetes, e de uns oito ou nove centímetros de longo. Cortaremos o lateral dereito de forma redondeada nas esquinas, xa que esta será a tapadeira do espazo para as moedas. A outra peza deste apartado é outro rectángulo de cinco centímetros de longo e o mesmo ancho que a outra peza máis seis centímetros adicionais, xa que necesitaremos tres centímetros en cada estremo para facer as dobreces para ampliar a capacidade do apartado das moedas.

Unha vez que xa temos todas as pezas de papel que imos precisar cubrirémolas co forro autoadhesivo para protexelas e que non se nos derrame a nosa carteiriña. Forrarémolas todas de maneira individual agás a peza principal e o peciña en forma de trapecio do peche, que as forraremos facendo unha soa peza, tal e coma se ve nas fotografías. E comezamos a coser!!

Primeiro coseremos as catro pezas destinadas aos separadores de tarxetas uníndoas por o lateral dereito. Unha vez que cheguemos a parte superior do rectángulo máis ancho unirémolas ao separador de billetes; e xa ao chegar á parte lateral esquerda uniremos todo á peza principal, continuando con esta costura tamén pola parte inferior.

Unha vez rematado este proceso xa temos a metade do traballo feito, e só nos queda o apartado das moedas.

O primeiro que faremos neste apartado será coser o lateral dereito do rectángulo máis longo (o que cortamos de forma redondeada nas esquinas), xa que podemos coser arredor del as puntadas coma adorno, posto que oao ser a tapadeira do apartado de moedas non o temos que unir a outra peza. Agora dobraremos a outra peza nos extremos dúas veces, tal como vemos na imaxe, e unha vez dobrada coserémola á outra peza do apartado de moedas e á carteira á vez. Este é o punto se cadra máis complexo de todo o proceso, xa que tentaremos que a metade do extremo esté cosida tamén á parte que dobramos anteriormente, para evitar que se abra demasiado o moedeiro. A explicación pode resultar algo baralleira, polo que espero que as fotografías vos sexan de axuda, inda que se tedes algunha dúbida sempre podedes preguntar!!

Unha vez finalizadas as costuras só quedaría colocar o velcro para pechar, tanto o moedeiro coma toda a carteiriña. Utilizaremos velcro autoadhesivo, polo que cortamos uns circuliños e pegámolos nos peches.

E lista a nosa carteira para levar ao peto!! (iso si, non esquezades meter algo de diñeiro antes!!).

14
Mar
2012

Marco de algodón e tea

Xa estamos aquí de novo! O que imos facer hoxe será un marquiño para colgar nas nosas paredes.

Para comezar, coma sempre, empezaremos cos materiais que imos precisar. Nesta ocasión serán cartón, algodón, unha tea bonita, unha grampadora, cordón e unha cola para tecidos.

O primeiro de todo será cortar o cartón. Precisaremos dúas pezas, unha rectangular, que será a parte traseira do marco, e outra, tamén rectangular e das mesmas dimensións que a primeira, pero cun rectángulo oco no centro, que será onde estará a foto!! Arredor da foto deixamos unhas marxes amplas para que quede máis bonito e rechamante.

Unha vez teñamos as pezas de cartón, cortaremos a tea necesaria para cubrir a parte dianteira (un pouco máis tendo en conta o necesario para suxeitala). Despois cortaremos a parte central da tea en dirección perpendicular a cada unha das esquinas do rectángulo interior, e utilizaremos a grampadora para fixar a tea ao cartón.

Unha vez feito isto uniremos, tamén coa axuda da grampadora, as dúas pezas de cartón, deixando un dos laterais sen unir, para poder introducir as fotos.

Agora colocaremos abundante algodón en cada un dos laterais do marco e seguidamente cubrirémolo coa tea que xa tiñamos suxeita ao interior do marco. Fixaremos o sobrante da tea con cola á parte posterior do marco. No lateral que deixamos sen unir para poder introducir a foto, no canto de fixar a tea sobrante a parte posterior fixarémola á parte posterior do cartón dianteiro, para seguir deixando oco entre os dous cartóns.

Para deixar ben rematadiño o noso marco, pegaremos un rectángulo de tea na parte posterior do mesmo, evitando así que poida verse o cartón.

O último paso será colocar o cordón que servirá para colgar o marco, isto farémolo tamén coa axuda da grampadora, grampando as dúas puntas do cordón na parte posterior do marco e algo separadas entre si, para que faga un triángulo cando o colguemos.

E xa está, listo para a parede!!

28
Feb
2012

Testo forrado con tea

Con estes días tan soleados que estamos a ter, non vos apetece pór unhas plantiñas nas vosas xanelas? Pois aló imos! E para que luzan mellor imos facer uns testos moi alegres forrados con teas.

O material que precisamos é ben sinxelo: uns testos (xa sexan de barro ou mesmo de plástico), unhas teas con moitas cores e un pouco de adhesivo.

E se o material é do máis sinxelo, o proceso pouco menos. O primeiro será cortar un anaco de tea suficiente para envolver ao testo, e unha vez teñamos a tea comezamos a pegar. O único que tedes que ter en conta é, ou ben irlle facendo pregues á tea a medida que vaiades enrolando ao testo, ou ben ir colocando a tea de forma diagonal, xa que o testo é cónico, e vai levar máis tea na parte superior que na inferior.

E xa está listo o noso testo redecorado!!

Agora poñemos unhas plantas bonitiñas no seu interior e… para a ventá!! (o testo de cereixiñas tamén esta forrado de tea!).

22
Feb
2012

Colar de feltro enrolado

Hoxe imos tornar ao noso material preferido: o feltro. E o que faremos será un colar.

Os materiais que utilizaremos serán o feltro (eu vou facer o colar en dúas cores, pero poderíamos facelo en moitas máis!), cordón de coiro, no meu caso negro, e unha agulla algo grande para poder pasar o cordón .

Como vedes eu elixín feltro verde e negro. O primeiro que faremos será cortar tiras de feltro, de aproximadamente un centímetro de ancho e 20 centímetros de longo.

Unha vez teñamos abundantes tiriñas cortadas empezaremos a enrolar dúas xuntas (unha de cada cor) ata ter un circuliño. Convén que a tira que poñamos por fóra, no meu caso a negra, sexa un pouquiño máis longa que a que vai por dentro. Para ir suxeitando os circuliños colocamos un alfinete que evita que se desfagan.

Ao ter xa suficientes ciruliños (tantos coma queiramos de longo o colar) podemos empezar a metelos no cordón. Primeiro faremos un nó no cordón, para evitar que o círculo de feltro se mova ao seu aire polo colar (tamén teremos que facer un nó unha vez teñamos o círculo entre o cordón), Coa axuda da agulla pasaremos o cordón por entre o círculo de tea. Non convén que a agulla sexa moi grosa, senón vainos custar máis furar o feltro!

Entre cada círculo eu vou deixar un espazo de cordón sen nada, inda que outra opción sería por os circuliños todos xuntos.

E unha vez teñamos a longura de colar desexada, un ultimo nó, e listo!!! Tamén poderíamos facer como dixen ao inicio cada círculo de cores diferentes, tendo así un colar moito máis festeiro, ou outra opción é facer con esta idea cintas para decorar a árbore de Nadal!! (pero ese é un segredo!).

09
Feb
2012

Caixa de sugus

Hoxe imos facer outra caixa!! (xa iredes vendo que nos gusta moito decorar caixas, pero é que son moi útiles para gardar calquera cousa e ben decoradas quedan moi bonitiñas pola nosa casa!)

O que utilizaremos para decorar esta caixa serán envoltorios de sugus! (e si, así de paso tamén reciclamos). Se non sodes moi lambóns e pensades que nunca poderedes comer tantos sugus coma para forrar unha caixa cos seus papeis, sempre podedes convidar aos amigos, coa condición de que vos devolvan o papel, e enteiriño!!). Pois unha vez teñamos os envoltorios, o resto de material que imos precisar é moi sinxelo: unha caixa de cartón que teñamos por casa, un pouco de pegamento de tubo e forro adhesivo para poñer ao final.

Eu vou utilizar unha caixa refeita, para que sexa máis pequeniña e xeitosa.

Antes de pegar os envoltorios convén, se a caixa ten letras ou debuxos, cubrila con papel branco, xa que os papeis dos sugus son un pouco transparentes. Unha vez feito isto podemos comezar a pegar os papeis segundo a combinación de cores que prefiramos.

Eu utilicei algúns papeis antigos que tiña gardados e que son diferentes aos de agora, xa que o deseño modificouse nos últimos tempos, pero así queda máis retro!!

Unha vez rematemos de cubrir toda a caixa con os envoltorios colocaremos o forro adhesivo sobre eles, para evitar que podan romper os papeis.

E xa temos a nosa caixa lista para gardar todos os nosos tesouros!! Déixovos tamén unha foto dunha caixa que fixera con envoltorios de palotes, por se a alguén non lle gustan os sugus!

02
Feb
2012

Espello de pinzas da roupa

Hoxe imos facer un espello para decorar e darlle moita cor aos nosos cuartos, e para crealo imos utilizar…pinzas da roupa!! E si, vai quedar algo ben bonito e nada cutre, porque non imos facelo con pinzas de plástico de cores “chungos”, senón que imos utilizar pinzas de madeira pintadas por nós mesmos!!

Os elementos que imos precisar son: un espello redondo (pódese mercar nunca cristalería ou nunha tenda de produtos para o fogar), unha madeiriña tamén redonda e algo máis grande que o noso espello, que podemos mercar nunha tenda de manualidades, pinzas de madeira e pinturas. Non é preciso ter pinturas de moitas cores, xa que o máis entretido e ir creando cores diferentes mesturando as que teñamos!

O primeiro que temos que facer é, precisamente, desfacer. Imos desfacer as pinzas quitándolles a peza metálica que as une e obtendo dous pequenos paus de madeira de cada unha. Unha vez desfeitas pódense lixar un pouco e eliminar así as imperfeccións que teñan.

E comezamos a pintar! Esta é sen dúbida a parte máis entretida, xa que imos tentar tantos cores como pinzas precisemos, e non vale repetir!

Unha vez temos a cantidade suficiente de pinzas pintadas podemos empezar a pegalas sobre a madeiriña, a cal tamén pintamos previamente.

Primeiro temos que pegar o espello ben centrado na madeira, e despois, no espazo de madeira que sobresae empezamos a pegar as pinzas. Este momento tamén é bastante entretido, xa que temos que ir colocando as pinzas e combinando á vez as cores de cada unha.

Así, pegando unha a unha, imos creando o noso espello. Unha vez acabadas de pegar todas, para o cal utilizamos unha cola para madeira, deixámolo secar ben. Cando xa estea todo ben fixado colocaremos un pequeno enganche na parte posterior da madeira para poder collo….xa está!! Non me diredes que ao final si que é bonitiño e non como pensarades ao principio? (e si, ao fondo podedes ver o colgante de peixes que fixemos a semana pasada!).

29
Xan
2012

Diadema de botón

Quen non sabe a estas alturas que as diademas son tendencia? Pois os que lean este post saberán tamén o sinxelo que é facer unha totalmente á moda con soamente un botón forrado cunha bonita tea!!

Os materiais necesarios serán o botón forrado, unha sinxela diadema metálica, un pouco de feltro para a parte posterior, e cola forte.

O único que temos que facer será introducir o botón pola diadema, gracias ao pequeno enganche que o botón ten para ser cosido. Unha vez colocado na posición que máis nos guste, pegamos un círculo de feltro de modo que o botón quede suxeito, e do mesmo modo que non se vexa a parte metálica.

E isto é todo, xa estamos listos para lucir unha fermosa diadema nas nosas cabezas!!

24
Xan
2012

Colgante de peixes de feltro

Hoxe imos facer outro elemento decorativo para dar cor e tentar facer máis leda a nosa casa. E de que se trata? Pois dun colgante con animaliños coma eses que podemos ver sempre nas tendas indias ou decorando as fermosas teteirías do sur.

Os materias que imos precisar serán feltro, algodón para o recheo, fío para as costuras e unha corda e abelorios para unir os distintos “animaliños”.

O deseño que imos utilizar será un simpático peixe cun gran ollo (pero podedes elixir outro deseño). O primeiro é facer o modelo en papel, para despois ir recortándoo nas teas de feltro de diferentes cores. De cada cor recortaremos dúas pezas, que encheremos de algodón, pero antes disto recortaremos tamén circuliños de fieltro branco e negro para facer os ollos dos nosos peixes!

Unha vez teñamos todo recortado podemos empezar a coser. O primeiro serán os ollos a cada unha das pezas (un círculo branco máis grande e un negro pequeno que fará de pupila). Ao ter isto feito unimos as dúas pezas de cada un dos peixes coséndoas, á vez que os imos enchendo de algodón.

Ao ter todos os peixes imos unilos, para o que usaremos a cordiña, que pasaremos entre as figuriñas coa axuda dunha agulla algo gordiña. No espazo de corda que queda entre cada peixe imos colocar boliñas de abelorios de diferentes cores para darlle máis «vida» ao noso colgante!

17
Xan
2012

Caixa multicor

O que imos facer hoxe é reciclar! Converteremos unha vella caixa de zapatos nunha bonitiña caixa multicor de feltro.

O primeiro será facernos cunha caixa, que ben pode ser de zapatos ou a caixa dun móbil ou calquera outro artigo. O mellor, se é unha caixa un pouco grande, como é o noso caso, será desfacela para facela logo algo máis pequena e cadrada, xa que así quedará máis riquiña.

Ao ter xa a nosa caixa pasamos ao seguinte paso, que será pegar anacos de feltro de distinto cor en cada un dos diferentes lados da caixa, excepto na tapadeira, xa que esta será a peza máis importante na decoración da nosa caixa.

Para decorar a tapadeira cortaremos tiras de feltro de aproximadamente un centímetro de ancho de cantas cores como teñamos.

Despois iremos colando as tiras en dous dos laterais da tapadeira, e unha vez os teñamos cubertos colleremos tiras dun e doutro lado entrecruzándoas de modo que se vaian creando cadriños de cores. Cada unha das tiras que vaiamos cruzando irémola pegando no lateral oposto. Podemos ver o proceso a seguir nas seguintes fotografías.

Unha vez entrecruzadas todas as tiras de tea xa temos rematada a nosa caixa multicor!! E voilà!!