A aventura vive no norte de Portugal

Pena Aventura Park, Ribeira da Pena, Portugal. Polaris
Algunha vez soñaches con voar? Hai un lugar no norte de Portugal onde podes facelo.
Chámase Pena Aventura, un parque de 16 hectáreas dedicadas aos deportes lúdicos e a aventura onde persoas de todas as idades poden descargar adrenalina ou simplemente gozar da natureza. A atracción estrela é o Fantasticable, o maior cable colgante do mundo, situado a unha altura de 150 metros, que nos permite sentirnos como paxaros ao deslizarnos en posición horizontal polos seus 1.530 metros de lonxitude, dunha montaña a outra, sobre as árbores e a estrada.

Pena Aventura Park, Ribeira da Pena, Portugal. Salto InvertidoDurante o percorrido polo Fantasticable podemos acadar unha velocidade de ata 130 km/h. Deixarse levar pola gravidade a esa altura impresiona (e moito), pero a experiencia resulta sumamente agradable e tranquila. Por iso esta atracción é apta para case todas as idades, desde nenos a partir dos 35 kg a todo tipo de adultos (ata se chegou a tirar un ancián de 87 anos!). Polas súas características tamén é accesible a persoas con discapacidade, algo que subliñan en todo momento os responsables do parque.

Para aqueles que busquen emocións máis fortes, o salto negativo non defrauda. Pensa en algo parecido a deixarse lanzar desde un tirapedras. Os participantes están suxeitos por dúas cordas que se tensan, para despois ser lanzados en sentido vertical invertido a 15 metros de altura nun segundo -o que segundo afirman na web do parque equivale a nada máis e nada menos que a 500 km/h-. A adrenalina por suposto está garantida.

En Pena Aventura tamén podemos dar renda solta ao noso espírito competitivo e aniquilador no campo de paintball, practicar a escalada e facer tiro con arco. Os percorridos de aventura son outra divertida opción, que pon a proba as nosas habilidades en altura, invitándonos a cruzar pontes colgantes entre as árbores e deslizarnos en tirolina. Hai tres niveis: dificultade media, elevada e infantil.

Tamén son numerosas as actividades relacionadas coa auga. A máis espectacular é o descenso de canóns, pero ademais é posible practicar piragüismo, rafting e stand up, unha variante do surf que consiste en manterse en pé sobre unha táboa e desprazarse pola auga coa axuda dun remo. A oferta complétase con percorridos en Segway e en vehículos todoterreo. Para os máis pequenos hai distintas actividades, como trampolíns, minigolf e percorridos de aventura infantís.

Pena Aventura sitúase en Ribeira da Pena, a menos dunha hora de Verín, polo que é unha boa opción para pasar a fin de semana. O parque tamén é destino habitual de moitas despedidas de solteiros/as, que buscan festexar dunha forma diferente.

Pena Aventura Park, Ribeira da Pena, Portugal. Percorridos de Aventura

Shares

1 comentario

  • Arrocito di:

    Estupendo artigo se non fose porque falta o aspecto negativo deste impresionante lugar: É completamente adictivo!!

Deixa unha resposta

O teu enderezo electrónico non se publicará Os campos obrigatorios están marcados con *